దూది మబ్బులు తెల్లగొడుగై
కొండగద్దియ పైనఁగొలువై
మనిషి చేతల వింతఁ గనుమయ్యా
ఓ
నరసింగమయ్యా
మంచి చెడ్డల చింతనిడుమయ్యా!
౧}నేరమనక ఘోరమనక
కోరుకున్నది దక్కుదనుక
పరుగు తీతే బతుకు గురుతాయె
ఓ
నరసింగమయ్యా
దొరకనంతనె వెతలు మొదలాయె
|| దూది||
కరుణఁగలిగి కట్టు నిలిచి
పరుల బతుకు విలువ నెఱిగి
సిరుల అర్థము లోతు తెలియంగా
ఓ
నరసింగమయ్యా
ముందు కేగగ ఊతనిడుమయ్యా!
|| దూది||
పక్షులన్నీ పశువులన్నీ
నేర్పుతున్న పాఠమెఱిగి
భూమి తల్లినిఁ గాచుకొనంగా
నరులకేలా బుద్ధి రాదయ్యా!
ఓ
నరసింగమయ్యా!!
చేయూత నొసగే దిక్కు నీవయ్యా!
|| దూది ||
--లక్ష్మీదేవి.
కామెంట్లు లేవు:
కామెంట్ను పోస్ట్ చేయండి